मौसम परिवर्तनले यी रोग लाग्लान्, यसरी बचौँ

बिस्तारै जाडो बढ्ने क्रममा छ । मौसम परिर्वतनले स्वास्थ्यमा नकारात्मक असर पु¥याइरहेको हुन्छ । मौसम परिवर्तनसँगै शारीरिक अवस्थामा पनि धेरै परिवर्तन भैरहेको हुन्छ । विशेषगरी यो मौसममा ब्याक्टेरियाका कारण ज्वरो, रुघाखोकी जस्ता सरुवा रोग लाग्ने सम्भावना उच्च रहन्छ ।

मौसम परिवर्तनको समयमा एक्कासी चिसो बढ्नुका साथै अत्याधिक प्रदूषण हुने भएकाले स्वास्थ्यमा देखापर्ने विभिन्न समस्या यही कारणले नै भएको हो भनेर यकिन गर्न कठिन हुन्छ । मौसम परिवर्तन भैरहेको समयमा जथाभाबी खाने र खानपानमा ध्यान नदिँदा बिरामी पर्नुका साथै अन्य इन्फेक्सन हुने सम्भावना पनि उत्तिकै हुन्छ ।

यो मौसममा भाइरल संक्रमण वा ब्याक्टेरियाको इन्फेक्सन भएमा के गर्ने ?
शरीर कमजोर हुने, खाना खान मन नलाग्ने, वाकवाक लाग्ने, टाउको दुख्ने, हल्का ज्वरो आउने जस्ता लक्षण देखा पर्छ । यस्ता लक्षणहरु एक दुई दिनसम्म देखियो भने भाइरल इन्फेक्सन भएको हुन सक्छ ।

सामान्यरुपमा लाग्ने मौसमी रुघाखोकीको वास्ता गरिएन भने भविष्यमा जटिल रुप लिन सक्छ । यदि रुघाखोकीको समयमै उपचार हुन सकेन भने घाँटी, फोक्सो, कलेजो, पेट र टाउकोमा इन्फेक्सन हुन्छ ।

यस्ता संक्रमणबाट बच्न वा उपचारका लागि सर्वप्रथम रोगको पहिचान गर्नुपर्छ । भाइरल संक्रमण भएमा घरमै प्रशस्त मात्रामा शुद्ध पानी पिउने, हरियो सागसब्जी, फलफूल खानुपर्छ । तर बयाक्टेरियल इन्फेक्सन भएमा, लामो समयसम्म ठिक नभएमा चिकित्सकसँग परामर्श लिनुपर्छ ।

बच्ने उपाय
यस्ता संक्रमित रोगहरु सजिलै खोकी र खकारको माध्यमबाट अन्य व्यक्तिमा सर्न सक्छ । त्यसैले भिडभाडबाट टाढा बस्ने, शुद्ध पानी प्रशस्त मात्रामा पिउने, स्वस्थ्य खाना खाने र माक्स लागाएर हिँड्ने बानीको विकास गर्नुपर्छ ।

यो मौसममा रोग प्रतिरोधात्मक क्षमता कमजोर हुन्छ । त्यसैले ज्येष्ठ नागरिक र बालबालिकालाई संक्रमण छिट्टै हुने भएकाले ध्यान दिनुपर्छ ।

शारीरिक व्यायाम वा हरेक दिन बिहान आधा घण्टा हिँड्ने बानीले पनि यस्ता समस्याबाट बच्न सकिन्छ । साथै आरामको पनि उत्तिकै जरुरी हुन्छ । सामान्यतया एक व्यक्ति स्वस्थ्य हुनका लागि दैनिक ६ देखि ७ घण्टा सुत्नैपर्ने हुन्छ ।