स्वास्थ्य जाँचबिनै कैलाली नाकाबाट भित्रिए साढे १९ हजार नेपाली

कैलाली। रोजगारीका लागि भारतका विभिन्‍न शहर गएकाहरू आज पनि बिहानैदेखि घर फर्किरहेका छन्। कोरोना भाइरस संक्रमणको जोखिमसँगै नेपाल र भारत दुवैतर्फ लागू गरिएको लकडाउनका कारण कामका लागि भारत गएका हजारौं नेपाली उतै अलपत्र परेका थिए।

उनीहरूलाई स्वदेश ल्याउन नेपाल-भारत सीमा जोडिएका नाकाहरू खुला गरिएको छ। सीमा क्षेत्र तथा भारतको विभिन्‍न क्वारेन्टाइनमा रहेका नेपालीहरूलाई भित्र्याउन उद्धार भइरहेको जिल्ला प्रशासन कार्यालय कैलालीका सूचना अधिकारी शिवराज जोशीले बताए।

उनीहरूमध्ये केहीलाई स्थानीय तहले क्वारेन्टाइनमा राख्न लगेका छन्। सयौ नाकामै खुला चौरमा बस्न बाध्य छन्। भारतबाट आउनेमा महिला, केटाकेटी हुँदा उनीहरूले झन बढी कष्‍ट भोग्नुपरिरहेको छ। २ वैशाखदेखि अहिलेसम्म त्रिनगर नाकाबाट १९ हजार ५२१ जना नेपाली भित्रिएका छन्।

जसमा २ वैशाखमा ३८३, ३ गते ४०३, ७ गते ८३४, ८ गते दुई हजार ४९८, ९ गते दुई हजार ११, १० गते एक हजार ९५९, ११ गते तीन हजार ९६४, १२ गते दुई हजार २२७ र १३ गते पाँच हजार २४२ जना छन्। धनगढीको त्रिनगर भन्सार नाकाको बाटो भएर आज पनि हजारौं श्रमिक फर्किरहेका छन्।