‘गरिब-धनी सबै वर्गले सेवा लिनसक्ने चेन हस्पिटल खोल्दै छौं’

‘राम्रो नीति आए नेपाललाई इन्टरनेसनल युनिभर्सिटीको हब बनाउन सकिन्छ’

प्रतिनिधिसभाका सांसद एवं लिटिल एन्जल्स स्कुलका सञ्चालक, तथा उद्यमी उमेश श्रेष्ठ चेन अस्पताल बनाउने योजनामा अघि बढिरहेका छन् । यो वर्षको अन्त्यसम्ममा सञ्चालन गर्ने गरी उनले ५० करोड रुपैयाँ लगानीमा अस्पताल बनाउने तयारीमा छन् । उनको योजनाअनुसार गरिब-धनी सबै वर्गले सेवा लिनसक्ने चेन हस्पिटल खोल्ने तयारी छ । उद्यमी श्रेष्ठले पछिल्लो समय शिक्षासँगै जलविद्युत्, होटेल तथा पर्यटन, कृषिसँगै स्वास्थ्य क्षेत्रमा लगानी बढाएका हुन् । उद्यमी श्रेष्ठसँग कोरोना महामारीबीच प्रत्यक्ष भिडियो कुराकानी सम्भव नभएपछि नेपालखोजका जगत भण्डारीले टेलिफोनमार्फत यिनै विविध विषयमा कुराकानी गरेका छन् ।

हाइलाइट्स :

– अहिलेको समयमा देश परिवारलगायत सबैले समस्या खेपिरहेका छन् ।
– नीति निर्माताहरु एकदमै फ्लेक्जिबल भएर बाँच्ने-बचाउने सिद्धान्तमा अगाडि बढ्नुपर्छ ।
– उद्योग व्यवसायलाई कसरी बचाउने र चलायमान बनाउने भनेर सरकारले गम्भीर भएर सोच्नुपर्छ ।
– मैले पहिला लामो समय शिक्षा क्षेत्रमा काम गरें । सरकारले त्यस क्षेत्रमा राम्रोसँग लगानी गर्न सकेन । त्यसैले म देश निर्माण हुने क्षेत्र कृषि, बैकिङ, हाइड्रोमा लागें ।
– मलाई कोरोना लागेपछि अस्पतालको आवश्यकता रहेको महसुस भयो र विगत केही महिनादेखि अस्पताल खोल्ने अभियानमा छु । चेन हस्पिटल खोल्ने अभियानमा छु । हस्पिटलबाट नाफा नलिने सोचाइ छ ।
– गरिब देखि धनी सबै वर्गले सेवा लिनसक्ने अस्पताल खोल्ने अभियानमा छु ।
– पैसा भनेको हर ठाउँबाट कमाउन सकिन्छ । संसारभर हेर्दा अरु ठाउँबाट कमाएर सेवाका लागि शिक्षा र स्वास्थ्यमा लगानी गरिन्छ । मैले पनि त्यहीअनुरुप सेवा गर्न यो अस्पताल खोल्दै छु ।
– शिक्षा र स्वास्थ्य भनेको राज्यको दायित्व हो । राज्यले राम्रो लगानी गर्‍यो भने प्राइभेट संस्थाको जरुरत नै पर्दैन ।
– नेपालजस्तो सुन्दर देशलाई स्वास्थ्य हब बनाएर धैरै कुरा गर्न सकिन्छ । रोजगार दिनेलगायत काम गर्न सकिन्छ ।
– एकान्तकुनामा हामीले खोल्न लागेको हस्पिटलचाहिँ बुटिक हस्पिटल हो । त्यहाँ एकदमै राम्रो डाक्टरहरुको टिम हुनुहुन्छ । ५० बेडको अस्पताल त्यहाँ हाई लेभल जसले अफोर्ड गर्न सक्छ उहाँहरुका लागि । यो अस्पताल उपचारकै लागि विदेश जानु नपरोस् भन्ने उद्देश्यले खोल्न लागिएको हो ।
– अस्पताल अहिले बन्दै छ । ६ महिनादेखि ९ महिनाभित्रमा सञ्चालनमा आउँछ ।
– मैले संसारभर नै डिमान्ड भएको अहिलेको आवश्यकताअनुसारको टेक्निकल प्रोफेसनल स्कुल कलेजहरु खोल्ने योजनामा छु ।
– हामी २०२८ सालकै कानुनमा छौं अहिलसम्म त्यही कानुनमा परिचालित छौं । नयाँ कानुन बनेपछि हामी सेवामूलक भावनामा युनिभर्सिटी, स्कुल, इन्जिनियरिङदेखि टेक्निकल स्कुल खोल्ने योजनामा छौं ।
– हामीले जुन क्षेत्रमा लगानी गरे पनि अन्त्यमा शिक्षा नै हाम्रो प्राथमिकताकमा आउँछ ।
– हामीजस्तो साना देशले ठूला-ठूला उद्योगमा फोकस गरेर हुन्न । हाइड्रोमा लगानी गर्न सकिन्छ । टुरिजमका लागि भर्जिन ल्यान्ड छ ।
– एउटा राम्रो नीति आयो भने नेपाललाई इन्टरनेसनल युनिभर्सिटीको हब बनाउन सकिन्छ ।
– हाइयर एजुकेसनका लागि नेपालबाट एक लाख विद्यार्थी बाहिर गएका छन् ।
– सरकारले लगानीमैत्री नीति बनाउने हो भने नेपाल १० वर्षमा कायापलट हुन्छ ।
– हामी टेक्नोलोजी फ्रेन्डली भएका कारण अनलाइनमार्फत कक्षा सञ्चालन गर्दै आएका छौं ।