कविता : एकतिस

यिनीहरू हाँस्दै आए भने

सम्झनू – यिनीहरूले कसैलाई रुवाएर आए !

यिनीहरूले जन्मदिन लाए भने

सम्झनू- यिनीहरूको जन्मदिन काटेर खाए !

यिनीहरुले कसैलाई बेइमान भने-भने

सम्झनू- त्यो मान्छे इमानदार रहेछ !

यिनीहरूले- चोर आयो भने- भने

सम्झन्- आज घरको ढोका नलाई सुते भएछ !

यिनीहरूले रात पर्यो भने भने

सम्झनू- आँगनमा घामका किरणहरुको मेला भयो !

यिनीहरूले उज्यालो भयो भने भने

सम्झनू- अब सुत्ने बेला भयो

यिनीहरुले छाता ओढे भने

सम्झन्- आज पानी परेको छैन

यिनीहरूले शख फुके भने

सम्झनू- आज कोही मरेको छैन !

यिनीहरूले नमस्ते गरे भने

सम्झनू- एक महिनापछि चुनाव आउँदैछ !

यिनीहरूले सुम्सुम्याउन अगाडि सरे भने

सम्झनू- आज मेरो शरीरको कुनै अङ्ग हराउँदैछ ।