‘संघर्ष र आत्मबल छ भने व्यावसायिक क्षेत्रमा फड्को मार्न सकिन्छ’

नेपालखोज २०७८ चैत ३० गते १२:५७

नेपालमा पछिल्लो समय महिलाहरू चुलोचौकोमै सीमित हुनुपर्छ भन्ने सोचाइमा केही परिवर्तन आउन थालेको छ । क्षमता हुँदाहुँदै पनि अवसर र परिवार तथा समाजबाट साथ पाउन नसक्दा महिलाहरू चुलोचौकोमै सीमित हुने गरेका थिए । पछिल्लो समय भने महिलाले परिवार सम्हाल्नेदेखि लिएर बाहिरी काम पनि गर्न सक्छन् भन्ने भावनाको विकास हुन थालेको छ ।
पहिलेको तुलनामा अहिले जुनसुकै क्षेत्रमा महिलाको पनि पुरुषसरह सहभागिता देख्न पाइन्छ । सामान्य टेम्पो चलाउनेदेखि लिएर ठूलाठूला व्यावसायिक क्षेत्रमा समेत उपस्थिति पाउन थालिएको छ । ढिलै भए पनि महिला-पुरुषको सहभागिता हरेक क्षेत्रमा समाज हुनुपर्छ भन्ने भावनाको विकास हुँदै गएको छ । समय र राजनीतिक परिवर्तनसँगै महिलाको क्षेत्रमा विस्तारै विकास पनि हुँदै गएको पाइन्छ । तर जुन किसिमले विभिन्न क्षेत्रमा महिलाको पहुँच पुग्नुपर्ने हो, त्यो हुन भने सकेको छैन । संविधानले हरेक क्षेत्रमा ३३ प्रतिशत महिला अधिकारको सुनिश्चित गरे पनि त्यो भने पूरा हुन सकेको छैन ।
यसर्थ, महिलाको क्षेत्रमा भएका काम तथा अधिकारका सम्बन्धमा समाजलाई चेतना दिने उद्देश्यले हामीले ‘नेपालखोजमा नारी’ कार्यक्रमको सुरुवात गरेका छौं । ‘नेपालखोजमा नारी’ कार्यक्रममा हामीले युवा महिलाहरूले समाजमा पुर्याएको योगदानका विषयमा चर्चा-परिचर्चा गर्ने गर्छौं । यो कार्यक्रम नेपालखोज आइनलाइन टीभी र नेपालखोज डटकममा एकसाथ पढ्न र हेर्न सकिन्छ ।

महिलाहरूले उत्पादन गरेका उत्पादनले बजार पाउन सकेन

महिलाको क्षेत्रमा भएका काम तथा अधिकारका सम्बन्धमा समाजलाई चेतना दिने उद्देश्यले हामीले ‘नेपालखोजमा नारी’ कार्यक्रमको सुरुवात गरेका हौं । ‘नेपालखोजमा नारी’ को आजको अंकमा व्यावसायिक क्षेत्रमा महिलाहरूको सहभागिता, उनिहरूको अवस्था तथा आइपर्ने चुनौतीलगायत विषयमा नेपाल राष्ट्रिय व्यवसायी महासंघका उपाध्यक्ष कुसुम महर्जनसँग मीरा साउँदले कुराकानी गरेकी छन् । प्रस्तुत छ उपाध्यक्ष महर्जनसँग गरिएको कुराकानी :

हाइलाइट्स :
-चीनबाट पहिला दिनको जम्मा दुई कन्टेनर सामान आयात हुने गरेको थियो । तर, अहिले महासंघको पहलमा सामान आयातमा केही सहज भएको छ ।
-चीनबाट गर्मीको सामान जाडोमा र जाडोको सामाजहरू गर्मी महिनामा आउँदा व्यवसायीहरू धेरै घाटामा परेका छन् । अहिले भने सामान आयात बढ्दा व्यापारीलाई केही राहत भएको छ ।
-महिलाहरूलाई आन्तनिर्भर बनाउन दिनुपर्ने तालिमहरू महासंघले अहिलेसम्म त दिएको छैन तर, त्यस्ता खालका तालिम दिनुपर्छ भनेर पहल भने गरिरहेको छ ।
-व्यवसाय गर्दा सबैभन्दा बढी भग्नुपर्ने समस्या भनेको आर्थिक नै हो । आर्थिक लेनदेनको कुराहरूमा महिलाहरूलाई झट्ट मानिसहरू पत्याइ हाल्दैनन् । अर्को परिवारको साथ भएन भने व्यवसायिक क्षेत्रमा अघि बढ्न गाह्रो छ ।
-महिलाहरूले उत्पादन गरेका वस्तुहरूले अझै राम्रो बजार पाउन सकेको छैन । धेरै संघर्ष गरेर महिलाहरूले वस्तुहरू उत्पादन गर्नुहुन्छ तर, राम्रो बजार पाउन नसकेपछि उनीहरूको आशा निराशामा परिणत हुन्छ ।
-मैले आफैंले पनि धेरै महिला दिदी-बहिनीहरूलाई विभिन्न किसिमका तालिम दिएर, आर्थिक सहयोग पनि गरेर व्यावसायिक क्षेत्रमा आबद्ध गराएकी छु । उनीहरूले गरेको सफलताले आफूलाई निकै आत्मसन्तुष्टि दिन्छ ।
-महिलाहरूलाई आत्मनिर्भर बनाउन विभिन्न किसिमका तालिम दिएर उनीहरूले उत्पादन गरेका वस्तुहरूलाई बजार उपलब्ध गराउन सरकारले भूमिका खेल्न सके कोही महिला पनि चोलोचौकोमा सीमित हुनु पर्दैन ।
-परिवारको साथ खट्न सक्ने क्षमता र इच्छा छ भने जुनसुकै महिलाले पनि व्यावसायिक क्षेत्रमा सफलता हात पार्न सक्छन् । तर, संघर्ष र निरन्तरता भने अनिवार्य हुनुपर्छ ।