‘महिनावारीका बेला हिमाल आरोहण गर्न झनै गाह्रो’

नेपालखोज २०७९ वैशाख २१ गते ११:४७

नेपालमा अवस्थित विश्वकै सर्वोच्च शिखर सगरमाथा विश्वमै प्रख्यात छ । प्रत्येक वर्ष हजारौंको संख्यामा स्वदेशी तथा विदेशी नागरिकहरूले सगरमाथाको आरोह गर्ने गरेका छन् । सगरमाथा आरोहण गर्ने विषयमा कुनै सामान्य विषय होइन । यो आफैंमा निकै चुनौतीपूर्ण अनि गौरवमय विषय पनि हो । सगरमाथा आरोहण गर्न गएका नागरिक आफ्नो ज्यानको बाजी लगाएर गएका हुन्छन् यसमा कोही सफल हुन्छन् त कोही असफल । त्यस कारण पनि यो आफैंमा निकै अप्ठ्यारो विषय हो । तर निमा ल्हामु शेर्पाले सानै उमेरमा सगरमाथा आरोहण गरेर विश्वमै रेकर्ड कायम गरिसकेकी छन् । ‘नेपालखोजमा नारी’को आजको अंकमा हामीले उनै निमासँग कुराकानी गरेका छौं ।
कार्यक्रममा हामीले महिलाहरूले गरेका संघर्ष, सफलता तथा समाजमा पुर्याएको योगदानका विषयमा चर्चा-परिचर्चा गर्ने गर्छौं । यो कार्यक्रम नेपालखोज आइनलाइन टीभी र नेपालखोज डटकममा एकसाथ पढ्न र हेर्न सकिन्छ । महिलाको क्षेत्रमा भएका काम तथा अधिकारका सम्बन्धमा समाजलाई चेतना दिने उद्देश्यले हामीले ‘नेपालखोजमा नारी’ कार्यक्रमको सुरुवात गरेका हौं । ‘नेपालखोजमा नारी’ को आजको अंकमा सगरमाथा आरोहण गर्दा आइपर्ने समस्याहरू, चुनौतीहरू र निमाले सगरमाथा आरोहण गर्दै गर्दा भोगेका अनुभवबारे मीरा साउँदले कुराकानी गरेकी छन् । प्रस्तुत छ निमासँग गरिएको कुराकानी :

हाइलाइट्स :
-सगरमाथा आरोहण गर्नु मेरा लागि बाध्यता होइन रहर हो । सगरमाथा आरोहण गर्ने मेरो सानैदेखिको सपना थियो, अहिले पूरा भएको छ ।
-सगरमाथा चढ्ने सानैदेखिको रहर भए पनि यो काम आफैंमा निकै कठिन रहेछ । त्यहाँसम्म पुग्दै गर्दा मैले बीचमा त सक्दिनँ होला भनेर झन्डै ‘गिभ अप’ गरेको थिएँ । तर, दाजुहरूको हौसलाले आरोहण गर्न सफल भए ।
-जब म चुचुरोमा पुगें । तब आफूलाई बाक्लो कपासको बादलमा पुगेको आभास गरें । आरोहण गर्नुअघि डराएको म पुगिसकेपछि त सहजै रहेछजस्तो महसुस गरें ।
-सुरुमा त मैले सक्छु भन्ने आशै गरेको थिएनँ । एक पाइला, दुई पाइला गर्दै म पाइला-पाइला पनि गन्दै थिएँ । त्यतिखेरको एक पाइला पनि अहिलेको एक माइलभन्दा बढी छ ।
-आरोहण गर्दा तुलनात्मक हिसाबले पुरुषभन्दा महिलालाई अप्ठ्यारो हुन्छ । अझ महिनावारी भएको समयमा झनै गाह्रो हुन्छ ।
-आरोहण गर्न जाँदा बेस क्याम्पसम्म सामान्य हामीले खानेजस्तो नै खाने कुरा खाइन्छ । त्यसभन्दा माथि भने ड्राइफुडसहरू मात्रै खाइन्छ ।
-यो वर्ष त अब आरोहण गर्दिनँ । ती अप्ठ्यारा पलहरू म अझै भुलेको छैन । अहिले त मलाई कसैले फ्रिमै लिए नि जादिनँ । अर्को वर्ष भने सायद जान्छु होला ।
-सगरमाथामा पहिलेको भन्दा धेरै सुधार भएको छ । फोहोरहरू पनि अहिले त्यस्तो छैन । यहाँ हुँदा कस्तो फोहोर छ भन्ने सुनेको थिएँ । तर, म त्यहाँ जाँदा त्यस्तो फोहोर भएजस्तो महसुस गरिनँ ।